Finalista no VI Concurso de Microrrelatos da Real Academia Galega!

 O microrrelato escrito por Nerea Villanueva de 6º de Primaria, titulado "Somos mulleres" resultou finalista da categoría Infantil do VI Concurso de Microrrelatos convocado pola Real Academia Galega e PuntoGal.

Os relatos gañadores e finalistas serán publicados proximamente na revista Luzes.

Parabéns para Nerea e para todas e todos os participantes neste concurso, especialmente aos nenos e nenas do noso centro!

Grazas pola ledicia e a motivación que dá acadar por segundo ano consecutivo un premio neste certame!

Ánimo e a seguir escribindo, contando, emocionando...

Máis información en:

• La Voz de Galicia
• RAG

Creamos con... Pablo Otero

Esta mañá visitou a nosa biblioteca, Pablo Otero, artista plástico e ilustrador. 

Os seus debuxos, pinturas e esculturas expóñense por toda Galicia.

Recibiu o Premio Isaac Díaz Prado de ilustración por "Contos por teléfono" (libro que está esperándote na nosa biblio). Ilustrou o libro de poemas "Cidades" de Fran Alonso; "Rato Pincho" de Gloria Sánchez; "Deseñadora de hora en hora" de Xoán Babarro. Escribiu e ilustrou obras propias: "Parece unha formiga", entre outras obras.

Xogamos e creamos coas letras, coas palabras como materiais plásticos que teñen formas que evolucionan.

Creamos ideogramas, representación gráfica dunha idea ou concepto. Unha palabra que podemos debuxar ou un debuxo que podemos ler.

A biblioteca convertiuse nun fervedoiro de imaxinación e creatividade!

 

 Grazas Pablo por visitar a nosa biblioteca!

II Festival Solidario Art For Change

O alumnado do noso centro participou con "Baleas e cachalotes con historia" escribindo  un microrrelato para cada balea impresa na 3D, figuras de plastilina,  papiroflexia, diferentes tipos de marcapáxinas, manualidades reutilizando materiais de refugallo (luras, peixes...) e láminas de paisaxes e animais mariños...

Agradecer a colaboración da ANPA Cabo Udra.

Parabéns a toda a comunidade educativa do IES Johan Carballeira implicada na organización do II Festival Solidario Art for Change e a todas as comunidades, asociacións, entidades participantes.

Abril, mes dos libros

Durante este mes de abril, mes dos libros a nosa bilioteca convértese nun fervedoiro de actividades coa gran axuda dos voluntarios e voluntarias.

Expositores de libros diferentes, de imaxes, tacto, realidade aumentada... polos corredores.

Actividade colaborativa de escritura creativa: Cal é o teu personaxe de libro favorito? debuxo e breve descrición do personaxe principal do seu conto favorito.

Grazas por participar!

Festival Art For Change

Hoxe, sábado 29 de abril, o IES Johan Carballeira organiza, en colaboración co Concello de Bueu, as comunidades educativas e diferentes entidades o II Festival Art For Change, un encontro coa ciencia e a arte na praza Massó, con actividades no Museo Massó e outras ubicacións.

O recaudado será para a asociación de divulgación e conservación do fondo mariño, 13 GRADOS e a ONG, Save the Children.

Esperámosvos! Busca e participa no stand do noso centro!

Teatro "As estacións"

Un grupo de nenas e nenos de 5º de Primaria representaron unha obra de teatro musical escrita por Elena, titulada "As estacións".

Nesta obra aprendimos que todas as estacións son importantes e necesarias para a Nai Terra.

Escolleron unha banda sonora moi apropiada para cada tempo.

Gran traballo!

Parabéns para Lolo, Violeta, Elena, Noa, Carmen, Leyre e Sabela!

Creamos con... Carmen García García

 Carmen García, xornalista, promotora de Xornal de Bueu, primeiro gran xornal dixital en galego de Bueu e a súa contorna impartiu un obradoiro de xornalismo para 4º, 5º e 6º de Primaria na nosa biblioteca.

Nunha primeira parte contounos que é o xornalismo, as funcións dos membros dunha redacción, as diferenzas entre prensa escrita e dixital, cales son os xéneros xornalísticos, as seccións, a xerarquización de contidos, as partes dunha noticia...

A continuación, creamos, deseñamos un xornal, agrupados en pequenas redaccións, cada quen coa súa función. Deseñamos a portada, escribimos as noticias con ilustracións, practicamos a entrevista entre nós...

Foi unha gran experiencia potenciando a creación escrita e o traballo en equipo.

Grazas Carmen por acompañarnos neste día especial na actividade Creamos con...

Teatro "Ti podes cambiar o mundo"

Durante a Hora de Ler Iria López, Saínza, Daniela, Rami e Sofía representaron para Infantil, 1º,2º e 3º de Primaria unha obra de teatro escrita e dramatizada por elas mesmas.

O seu título "Ti podes cambiar o Mundo" xa nos avanza que debemos coidar o medio ambiente concienciándonos para non tirar basura nin no monte, nin na praia, nin nos espazos públicos e que debemos reciclar, reutilizar e reducir.

Os entreactos e cambios de escena estiveron amenizados con música e baile.

Rematamos xogando co bee-bot para separar ben a basura e bailando... porque nos gusta moitísimo!

Parabéns por esta marabillosa obra de teatro! Sodes unhas grandes guionistas e tamén actrices!

Grazas por representar para nós!

Creamos con... Josuha Xanbreo

O venres 24 de marzo, gozamos dunha actividade de escritura creativa na Biblioteca, con Josuha Xanbreo.

Creamos personaxes e inventamos a nosa propia historia en banda deseñada.

Foi unha actividade moi divertida!

 

Moitas grazas Josuha por acompañarnos nunha actividade que nos gusta moito: "Creamos con... "

Camiños de Poesía 2023!

Para conmemorar o Día de Rosalía de Castro, 23 de febreiro,  cada titoría elixiu un poema que ilustrou colaborativamente. O fío condutor foron as herbas, as flores, as plantas... que aparecen nos poemas. 

Un ano máis creamos Camiños de Poesía:

 

21 de marzo, Día da Poesía, as alumnas e alumnos voluntarios lectores de 6º de Primaria sairon a colocar Camiños de Poesía.

Sempre Rosalía!

Mil primaveras máis para a Poesía!

21 de marzo: Día da Poesía

Un verso... un aloumiño.

Dous versos... dous aloumiños.

Moitos versos... moitos aloumiños.

Con estos versos de Antonio García Teijeiro queremos invitarvos a ler poesía, a prestar os libros da exposición arredor da Poesía.

Buscamos palabras, relacionamos, creamos rimas, escribimos poemas desde os máis cativos ata os maiores do centro.

Parabéns polos traballos tan ben feitos!