27 de out. de 2021

LECTURAS TERRORÍFICAS!

Durante esta semana, durante a HORA DE LER, trae unha lanterna para ler os teus libros favoritos de medo, de pantasmas, meigas, curuxas, vampiros, arañas, gatos negros, lobos, cabazas...

EMOCIÓNATE COA LECTURA!


24 de out. de 2021

MINUTOS MUSICAIS

 Ao longo desta semana na que celebramos o Samaín, escoitaremos "Na cova do rei da montaña". Unha peza de música orquestral composta por Edvard Grieg en 1875 como música incidental para a sexta escena  da obra de teatro Peer Gynt. 


                                      FELIZ SEMANA!!!

24 de outubro DÍA DAS BIBLIOTECAS

Hoxe, 24 de outubro, celébrase o DÍA INTERNACIONAL DAS BIBLIOTECAS,  recordando a destrución da Biblioteca de Sarajevo incendiada no ano 1992 durante a guerra dos Balcáns.

Alberto Moital, concelleiro de Patrimonio, Arquivo e Bibliotecas, invitounos a participar no xogo "Cita co libro" na biblioteca Torrente Ballester de Bueu.

Trátase dun xogo de pistas que consiste en adiviñar que libro se agocha nunha serie de caixas.

Anímate e participa do 21 ao 29 de outubro!



UNHA BIBLIOTECA CON RAÍCES NO CAMPO!

Co gallo do DÍA DAS BIBLIOTECAS visitamos a Biblioteca Pública de Beluso para coñecer a súa historia e as súas instalacións.

Da man de Belarmino Barreiro, arquiveiro municipal, soubemos que a Sociedade de Labregos El Progreso de Beluso, traballando todos xuntos, construíron unha casiña para as súas reunións con pedra do monte Borrallido.

Pouco a pouco, con diferentes aportacións, foise creando unha biblioteca a mediados do ano 1934. Aquí estiveron Castelao, Alexandre Bóveda, Johan Carballeira...

Despois da Guerra Civil (1936-1939) o edificio pasa ao Estado. Chegando a estar abandonado. Na década de 1970 pasa a ser unha Biblioteca estatal e arredor de 1996 encárgase do seu coidado o Concello de Bueu.

A BiBLIOTECA PÚBLICA DE BELUSO nace do campo, dos labregos, dos nosos tataravós, bisavós de persoas que pensaban que os libros son moi moi importantes para adquirir CULTURA.




A continuación, da man da bibliotecaria, Rosi, recibimos formación de usuarios e coñecemos a biblioteca.










Durante a visita, o alumnado de 1º de Primaria fíxolle unha interesante entrevista a Rosi. Descubrimos que a nosa Belusiña ten un compañeiro na biblioteca de Beluso. 

ANIMÁDEVOS A VISITALA E  DESCUBRIR A SÚA MASCOTA!

Moitísimas grazas Belarmino, Rosi e  Alberto Moital por acompañarnos neste día tan importante!

MOCHILAS VIAXEIRAS

Este venres como prólogo do DÍA DAS BIBLIOTECAS iniciaron a súa andaina as MOCHILAS VIAXEIRAS despois dun ano sin saír!

As nenas e nenos de novo ingreso recibiron o seu carné da biblioteca e as bolsiñas viaxeiras para protexer os documentos que van e veñen.









Non esquezas deixar a túa valoración, suxestións, traballo de investigación, recollida de cantigas, refráns, costumes, palabras, nomes de lugares relacionado co proxecto documental deste curso A MEMORIA DO NOSO!

22 de out. de 2021

Día das Escritoras: COÑECENDO A MÍRIAM FERRADÁNS

O alumnado de 6º de Primaria realizou un traballo de investigación sobre esta poeta da nosa contorna. Investigaron sobre a súa biografía e obra, realizáronlle unha entrevista. Concretaron a información recollida nesta presentación que expuseron oralmente aos compañeiros.

Pincha na imaxe para ver a presentación.


 

19 de out. de 2021

18 de outubro: DÍA DAS ESCRITORAS

Iniciamos a SEMANA DA BIBLIOTECA celebrando o DÍA DAS ESCRITORAS. Lemos unha selección de textos de escritoras, sobre todo da nosa contorna.

O voluntariado de 6º repartiu polos establecementos comerciais da localidade carteis cos textos e as persoas que iamos atopando agasallabámolas coa lectura e a tarxeta.

17 de out. de 2021

MINUTOS MUSICAIS

 Ao longo desta semana de outubro escoitaremos a canción "VIVIR" composta e interpretada  pola cantante Rozalén xunto con Estopa.


                                                        FELIZ SEMANA!!!

16 de out. de 2021

70º PREMIO PLANETA

CARMEN MOLA acaba de gañar o PREMIO PLANETA, coa novela titulada " La bestia".

Misterio resolto: Carmen Mola, presunta mestra que compaxinaba a docencia coa escritura anónima é o PSEUDÓNIMO baixo o que estaban tres homes: Jorge Díaz, Agustín Martínez e Antonio Mercero.

Este premio literario é o máis alto do mundo xunto co Nobel.


 

14 de out. de 2021

CROSS CABO UDRA 2021

O domingo, 10 de outubro, tivo lugar o V CROSS POPULAR CABO UDRA, organizado pola Asociación ASBEL coa colaboración de diferentes organismos: clubs de Atletismo Corredoiras e Vila de Cangas, Concello, CEIP Montemogos... e persoas voluntarias.

Foi un evento deportivo e tamén solidario, varias alumnas e alumnos colaboraron cun mercado solidario para recadar alimentos, produtos de limpeza... para a Protectora de Animais. 

Parabéns á organización!👏 Gozamos todos e todas dunha xornada deportiva, familiar  en contacto coa Natureza.


Esta carreira popular naceu a partir do CROSS ESCOLAR que se celebraba no noso cole desde, aproximadamente, 1980 ata o ano 2003 coa colaboración de toda a comunidade, en marzo, arredor da festividade de San Xosé.



Valora e participa na vida do teu pobo! 

A MEMORIA DO NOSO!





SOMOS PUNTO DE RECOLLIDA DE ÚTILES DE ESCRITURA

Comprometidos coa SOSTIBILIDADE  a través da RECICLAXE! 

Formamos parte de TERRACYCLE, empresa que recicla bolígrafos, rotuladores, rotuladores fluorescentes, correctores de todo tipo, permanentes. Non se recollen pegamentos, gomas, lapis, tesoiras.

Busca o punto de reciclaxe na entrada do centro!







11 de out. de 2021

MINUTOS MUSICAIS

Esta semana na que celebramos o 12 de outubro, escoitaremos un tema da película "1492:A conquista do paraíso" baseada no descubrimento de América por Cristóbal Colón.
A banda sonora foi composta polo músico grego Vangelis.


                          FELIZ SEMANA!!!

8 de out. de 2021

8 de outubro: DÍA INTERNACIONAL DA DISLEXIA

A dislexia é unha dificultade na aprendizaxe, de orixe neurobiolóxico, que afecta tanto a escritura como á lectura.

Resolve as túas dúbidas visualizando este vídeo:


Na biblioteca temos varios libros que che poden axudar a comprendela. Un exemplo: "LAS LETRAS Y YO. UN CUENTO SOBRE LA DISLEXIA" escrito por Iraida Llucià I Bagüés e Alicia Bailey Garrido, editorial Sandia Books.

Durante a Hora de Ler infórmate cos libros que viaxaron a Biblioteca a túa aula...

GOZA COA LECTURA e comprenderás mellor todo o que te rodea!

3 de out. de 2021

MINUTOS MUSICAIS

Este ano estréase como efeméride o "Día do cine español"(6 de outubro) ,co obxectivo de recoñecer o papel dos profesionais do cine e incentivar as salas de proxección, un sector moi afectado pola pandemia.

Nós queremos pór o noso grao de area  escoitando a banda sonora de "Mar adentro", unha película de Alejandro Amenabar que recibiu, entre outros, o Goya á mellor música orixinal, na que colaborou o músico vigués Carlos Nuñez.


Feliz semana !!