Minutos musicais!

 Semana de medo! 

Semana de terror! 

Semana de sustos!

Semana de escuridade!

Semana de lecturas terroríficas!

Semana de receitas espantosamente saudables!

Semana de música arrepiante!

Esta semana escoitaremos o tema O Samaín de Uxía Lambona e a Banda Molona!

Uxía Lambona e a Banda Molona, formada por cinco músicos e unha cantante, recollen os clásicos populares galegos dándolle o seu toque particular desde a Carolina rapeada ata o Jato rockeiro.

Uxía Lambona e a Banda Molona nace como un proxecto lúdico, musical e educativo, que pretende sobre todo divertir aos nenos e nenas, achegándolles os temas tradicionais galegos dunha forma nova e atractiva, utilizando para iso novos estilos musicais (ska, rock, hip-hop…) para que así coñezan e manteñan a nosa música tradicional popular.

Club de Lectura 6º Primaria

 Coincidindo co Día das Bibliotecas, 24 de outubro, iniciaron  a súa andaina as dúas seccións do Club de Lectura de 6º de Primaria, Os Belulectores.

O primeiro libro que imos ler é Alma de elefante, escrito por Andrea Maceiras e publicado por Xerais.

 Gozade coa lectura!

 

Lecturas Compartidas!

Os nenos e nenas de 2º de Primaria visitaron a clase de 4º de Infantil para compartir lecturas entre iguais.

Foi unha experiencia fantástica durante a Hora de Ler! 

Unha actividade máis dentro da Semana da Biblioteca!

 

 

Para saber máis desta actividade visita o blog de Infantil.

Futbolistas

Iniciamos unha semana moi especial, o 24 de outubro é o Día das Bibliotecas.

Este curso o Proxecto Documental anual versa sobre os deportes; leva por nome En Xogo!

O luns recibimos a visita de tres xogadoras de fútbol sala do equipo  Marín Futsal: Jessi (mamá de Ainhara), Carolina e Ana. 

Conversamos sobre a importancia de realizar deporte, comer sa, estudar, xogar en equipo... Amablemente responderon ás nosas preguntas sobre os seus inicios no deporte, no fútbol, no fútbol sala, os seus xogadores e xogadoras favoritas, o seu sitio no campo, a onde viaxan e como se desprazan, o lugar de entrenamento...

Enviámoslles os nosos mellores desexos para que logren grandes éxitos e consigan a Copa da Raíña!

Moita sorte! Seguro que asistirán moitos rapaces e rapazas aos vosos partidos para animarvos!

Mil grazas por compartir o voso tempo!

 

Escoita a entrevista a Jessi "Café" na radio.

Minutos musicais!

 Esta semana, que celebraremos o Día das Bibliotecas, escoitaremos Tan só con leres un libro de Mamá Cabra, grupo de música galego.

 Porque con leres un libro mil mundos podes achar

Feliz semana e boas lecturas!

Día das Bibliotecas 2023

 

Goza con esta pequena selección de libros arredor das bibliotecas e os libros:

Obradoiro de Booktrailers

 A finais do curso pasado recibimos a gran noticia de que nos concederon o SELO DE BIBLIOTECA ESCOLAR SOLIDARIA.

Grazas á asignación económica, as nenas e nenos de 5º e 6º de Primaria realizaron un obradorio para gravar e editar booktrailers guiados por María e Roi, profesionais de Gingko.

Elixiron un libro, escribiron un breve resumo, un pequeno guión, o stroryboard, buscaron atrezo e localizacións e aquí está o resultado...

Podedes visualizar que grandes artistas son!

Booktrailer de " Los calzoncillos de Oso Blanco" de Tatsuya Kameyama y Atsuko Nakagawa

Booktrailer de "Matilda" de Roald Dahl.

Booktrailer de "Atrapamiradas" de Marina Núñez.

Booktrailer de "Maruxa" de Eva Mejuto.

Booktrailer de "Invisible" de Eloy Moreno.

Booktrailer de " Hasta que podamos abrazarnos" de Eoin McLaughlin

Parabéns por esta actividade e polo traballo en equipo!

Día das escritoras 2023

Cita a cegas coa lectura!

Cada titoría foi recollendo o seu agasallo para unha cita a cegas coa lectura de obras de escritoras durante a Hora de Ler de hoxe!

Foi un momento compartido de lectura ben fermoso!

Os libros para o expositor de obras de escritoras foron seleccionados polo voluntariado de 6º de Primaria. Parabéns pola elección!

Sorpresa e emoción en Infantil: https://educacioninfantilbeluso.blogspot.com/2023/10/16-outubro-dia-das-escritoras.html

Minutos musicais!

Esta semana escoitaremos a Katrina and the Waves, banda inglesa formada en 1981, coñecida polo éxito de 1985 "Walking on Sunshine". 

A banda foi representate do Reino Unido no Festival de Eurovisión de 1997 con "Love Shine a Light". Coa súa participación, o Reino Unido acadou a súa 5ª vitoria no Festival de Eurovisión.

Feliz semana!

Recreos na biblioteca!

 Volvemos a gozar dos recreos na biblioteca!

 Ler, compartir... Biblioteca, punto de encontro!

Minutos musicais!

Tanxugueiras é un trío de pandeireteiras galegas formado por Aida Tarrío e as irmás xemelgas Olaia e Sabela Maneiro. 

O grupo traballa con repertorio da música tradicional galega, tratando de darlle unha sonoridade máis moderna, que a aproximan ao trap ou á electrónica. 

Nas súas pezas saliéntanse temas como o entendemento entre pobos, a defensa da lingua e da cultura galegas e o apoderamento da muller.

Esta semana escoitaremos o seu tema Aire.

Premio Nacional ao Club de Lectura!

Temos a gran sorte de compartir con toda a comunidade educativa a alegría de ser un dos terceiros premios na convocatoria de clubs de lectura escolares a nivel nacional concedidos polo Ministerio de Educación e Formación Profesional no curso 2022-2023.

Énchenos de satisfacción e sentimos orgullo polo labor que as persoas que formaron e formamos parte do Equipo de Biblioteca levamos realizando desde hai moitos anos a prol da lectura.

Anímate a formar parte dos nosos clubs de lectura!

Máis información nas páxinas do blog:

Club de Lectura Os Belulectores

Club de lectura de adultos

Apertura musical!

 O venres 6 de outubro gozamos na apertura da biblioteca, cunha gran actuación musical de Carmen, 6º de Primaria, violín e Rodrigo, 3º de Primaria, percusión. 

Interpretaron tres pezas de música folk.

Parabéns por este fantástico concerto!

Abrimos a biblioteca!

 O venres 6 de outubro apertura da biblioteca durante a Hora de Ler!

Concerto didáctico da Banda de Música de Bueu

 Este mércores gozamos dun concerto didáctico a cargo da Banda de Música de Bueu.

Puidemos coñecer diferentes tipos de instrumentos musicais e a función do director coa batuta. Incluso puxemos a voz a algunhas composicións de música actual.

Foi un gran encontro xa que na banda tocan antigos alumnos do colexio!

Grazas por esta marabillosa actuación e por compartir o voso tempo con nós!

Minutos musicais!

 Esta semana escoitaremos, durante o tempo de entrada, unha canción de Bob Marley, titulada Three Little Birds. É un canto pola vida e a positividade. Incluída no seu disco Exodus (1977), a mensaxe é clara: "Aínda que pareza que todo se derrube, non te preocupes, todo vai ir ben"

Bob Marley é unha das figuras musicais máis importantes do século XX. 

Está considerado como un dos pais da música reggae (mestura de ritmos xamaicanos, rock, blues e soul). Coas súas cancións quería cambiar o mundo. Considerábase a si mesmo un revolucionario e a súa arma para cambiar o mundo era a música "Describimos a nosa música como un camiño á conciencia. A nosa música é revolucionaria".

Convertido en icona pop, a súa prematura morte en 1981, non fixo máis que converter en perpetua a lenda dun home que, a través da súa mensaxe, pacifista e antirracista, conseguiu coarse na conciencia de millóns de persoas.

Levántate esta mañá, sorrí co sol nacente. Tres paxariños pousados xunto á miña porta... Dicindo esta é a miña mensaxe para ti, non te preocupes por nada porque cada pequena cousa vai saír ben.

Feliz primeira semana de outubro!