21 de set. de 2021

XOSÉ NOVAS: PERSOA SENLLEIRA DE BELUSO

CENTENARIO DO NACEMENTO DE

Xosé Novas Regueira, tamén coñecido como Joe Novas, naceu en Beluso o 21 de setembro de 1921.

No ano 1993 crea unha fundación para promover actividades culturais e benéficas, chamada "FUNDACIÓN XOSÉ NOVAS", chamada así en honra ao seu pai.

Foi nomeado Fillo Predilecto de Bueu e adicóuselle unha praza pública en Beluso, onde se ubica o parque infantil e o pavillón.

Para máis información le o FIADEIRO nº 27, ano 2021ou visita a biblioteca pública.


Tal día coma hoxe cumpriría 100 anos!

20 de set. de 2021

COMUNICANDO COAS MANS!

 23 de setembro: DÍA INTERNACIONAL DA LINGUA DE SIGNOS

Apoiamos e protexemos a identidade lingüística e a diversidade cultural de todas as persoas xordas e outros usuarios da lingua de signos.

Esta semana cantamos "TODOS SOMOS CAPITÁNS" de Magín Blanco. 

Intentamos saudarnos e despedirnos en Lingua de Signos. Consulta a páxina:

https://www.fundacioncnse.org/educa/bancolse/

Abecedario Dactilolóxico:

 

Para máis información visita o blog do Departamento de Orientación:

https://celamontemogosorienta.blogspot.com/2021/09/23-de-setembro-dia-internacional-da.html



 

 

19 de set. de 2021

MINUTOS MUSICAIS

 Nesta semana na que celebramos o DIA INTERNACIONAL DA LINGUA DE SIGNOS escoitaremos e cantaremos a canción "TODOS SOMOS CAPITÁNS" de Magín Blanco pertencente ao seu disco "A nena e o grilo nun barquiño", unha canción  interpretada en lingua de signos.


                                                      FELIZ SEMANA!!

12 de set. de 2021

MINUTOS MUSICAIS!!

 Nesta semana escoitaremos "FIGA" o último traballo do grupo galego TANXUGUEIRAS, canción escollida polos eurofans como favorita para representar a España no Festival de Eurovisión. Agardamos que así sexa!


         FELIZ SEMANA!!

8 de set. de 2021

MINUTOS MUSICAIS!

 Ola a todos e todas!

Comezamos un novo curso e con el as audicións semanais que iremos poñendo neste blog para que todos e todas poidades escoitar cando gustedes.

Recibimos o curso con moita ilusión e optimismo coa canción CELEBRATION. 

"Celebremos que estamos xuntos e que estamos todos. Hai moito que celebrar."


                                        

                         BENVID@S e FELIZ COMEZO!!!

22 de xul. de 2021

A VISITA DE ELVIA!


Ás veces teñen lugar encontros casuais. Acontecía en abril cando, tras unha idea espontánea, un destes encontros tomaba forma: Elvia, a pequena rastreadora, coñecida a través dos seus vídeos didácticos, dos libros que protagonizaba e mesmo localizada nunha das revistas de aula, coñecía por fin dende o outro lado da pantalla aos nenos e nenas que a seguían a centos de quilómetros de distancia.


Agardado con ansia o día programado, dezasete nenos e nenas de 4º de Primaria contaban nerviosos o tempo que faltaba para dar comezo a videoconferencia, facendo que ese día nin o recreo gozase de importancia: era o Día de Elvia!


Tralas presentacións a ambos lados das pantallas, deu comezo unha clase excepcional levada con pasmosa maestría pola pequena intérprete de rastros; na aula de 4º, as preguntas e comentarios xurdían coa naturalidade propia que preside unha xuntanza entre almas que comparten o mesmo respecto e amor pola natureza


Con Elvia desvelaron algúns dos misteriosos rastros que deixan as aves tras de si: as egagrópilas. Axudada dos seus pais, expertos rastreadores ambos, Elvia conseguía que transcurrise o tempo nun suspiro e que a cada instante, a sorpresa e a admiración na aula de 4º acadase cotas maiores. Nunhas fugaces dúas horas, a aprendizaxe traspasou a barreira da distancia, debuxando caras de asombro e provocando moreas de preguntas sobre os rastros e as pegadas dos seres vivos na natureza.


Pero foi Elvia, sen dúbida, a que deixou a pegada máis fonda: descubrir que unha nena coma eles podía ser quen de explicar con admirable profesionalidade os segredos da natureza, sementou nos nenos e nenas de 4º a seguridade de saberse importantes e capaces.


Case tres meses despois desta cita que selaba unha xa perdurable amizade, Elvia achegábase dende Navarra a Beluso, a coñecer o colexio que admiraba e que a admiraba: a directora, o secretario, a titora de 4º e a responsable da biblioteca escolar recibían con esmerado agarimo á familia de rastreadores. 


Pechado xa o curso escolar e baleiras as aulas, quiso non obstante o azar aderezar esta breve visita coa inesperada presenza de tres nenas da aula. Águeda, Cris e Uma coñecían en persoa a Elvia e deste breve encontro xurdía unha promesa prendida no tempo: procurar o reencontro en persoa de Elvia con toda a clase que xa estará daquela en 5º de primaria.


Se os desexos se transforman en realidade, Elvia e os amigos e amigas que a agardan en Montemogos, xuntarán as súas pegadas nun novo camiño por percorrer.


GRAZAS SOFÍA POR DARNOS A COÑECER A ESTA FANTÁSTICA FAMILIA!!!


https://m.facebook.com/1411329335747884/photos/a.1411331479081003/2902655986615204/?type=3&anchor_composer=false









19 de xul. de 2021

HÓSPEDE NO HOTEL DE BICHOS!

Este verán tivemos a gran sorte de contar cunha visitante no noso hotel de bichos, nada máis e nada menos que unha VACALOURA!

vacaloura, tamén chamada escornabois (Lucanus cervus) é un insecto, un dos escaravellos de maior tamaño de Europa. Pertence á Familia Lucanidae, que na Península Ibérica consta de 9 especies. En Galicia temos 5, onde esta especie é a máis espectacular.

As vacalouras macho válense das súas mandíbulas para loitar entre elas na procura das femias. As femias, pola súa banda, teñen unhas mandíbulas moito máis curtas, polo que é sinxelo diferenciar esta especie en canto ao sexo.

Nos ecosistemas galegos, a vacaloura xoga un papel moi importante para contribuír ao enriquecemento do solo dos bosques e á rexeneración e formación do humus, tanto por medio da súa alimentación como grazas aos seus detritos. 
Aliméntase de madeira descomposta de grandes árbores caducifolias (sobre todo carballos e castiñeiros) e serve de alimento a especies como as aves nocturnas, os petos carpinteiros, ourizos, teixugos ou raposos.

Coidemos a Natureza!







Que preciosidade!


24 de xuño de 2021

DESPEDIDA!

Xa remata o curso 2020-2021, no que tivemos que sorrir cos ollos, estar distanciados e non poder dar apertas. Oxalá pronto podamos ler xuntos, compartir lecturas, que volvan as mochilas viaxeiras...

Aplaudir o esforzo e a colaboración de toda a comunidade educativa e desexarvos unhas FELICES VACACIÓNS DE VERÁN!

Unha aperta moi especial aos nenos e nenas de 6º curso que se despiden do centro e desexarlles  moita sorte na súa nova andaina.

 
FELIZ VERÁN A TODAS E TODOS!


21 de xuño de 2021

RECOMENDACIÓNS DE LECTURA VERÁN 2021

Xa está aquí o verán, as vacacións e desde a Biblioteca desexámosvos unhas Felices Lecturas gozando da natureza que nos rodea.

Visita as librarías do noso pobo e as bibliotecas públicas.


FELICES VACACIÓNS!

20 de xuño de 2021

MINUTOS MUSICAIS!!

Despedimos as audicións musicais, ata a volta das vacacións, con música de VERDI e o "Brindis" de A Traviata, unha das súas máis famosas óperas.

Brindis que dedicamos a todos e todas vós: alumnado, profesorado, familias e persoal non docente por sobrevivir a un curso no que tivemos que aprender a sorrir cos ollos, a estar distanciados, a non poder abrazarnos, a non poder  xogar xuntos... máis aínda así mantivemos a alegría, a ilusión e a esperanza.


                       OS MELLORES DESEXOS PARA ESTE VERÁN!!

                                           

18 de xuño de 2021

KAMISHIBAI: "RA DE TRES OLLOS"

Para rematar este curso tan particular e anómalo, cheo de medos, preocupacións, tristeza, máscaras, patios divididos, xel hixienizante, lavado de mans, distancia social pero tamén de xogos, alegría, sorrisos, amizade, lecturas, roteiros, hotel de bichos, zona verde... hoxe gozamos, na entrada do centro, dun CONTACONTOS moi especial cun KAMISHIBAI.

Un Kamishibai é unha forma moi popular en Xapón de contar historias. Xurdiu no século XII, nos templos budistas e renaceu na década de 1930 debido á depresión económica, xa que contaban historias na rúa e así gañaban uns cartos extra.

O alumnado de 5º de Primaria, empregando un Kamishibai narrounos a historia de "RA DE TRES OLLOS" escrito e ilustrado por Olga de Dios.


Ra de Tres Ollos medra nun lugar contaminado e quere cambiar as cousas. Pero para eso necesita  axuda. 

TI... a que esperas para facelo?

“Este conto está dedicado a todas as persoas que cada día traballan para defender o  noso planeta.” Desta maneira empeza este fermosísimo álbum ilustrado.

Moitas grazas nenas e nenos de 5º, sodes uns grandes contadores e contadoras de historias!

Esperámosvos como voluntarias e voluntarios para o próximo curso!




17 de xuño de 2021

DIPLOMA RECREOS RESIDUOS CERO 2020-2021

Recibimos o Diploma do Ministerio de Educación e Formación Profesional que recoñece a participación no Programa Recreos Residuos Cero 2020-2021, organizado polo colectivo Teachers For Future Spain, contribuíndo á redución de residuos e a loita contra o cambio climático.

O noso alumnado participa activamente no blog: https://montemogos.blogspot.com/ promovendo accións para concienciar sobre o coidado do medio ambiente.



16 de xuño de 2021

PACO NOGUEIRAS E MARC TAEGER

Estes días de calor e final de curso estamos a gozar co concerto de PACO NOGUEIRAS e as ilustracións de MARC TAEGER do seu libro disco EXTRA! por xentileza da Editorial Kalandraka.

FOI MOI DIVERTIDO PARTICIPAR NUN CONCERTO VIRTUAL!

15 de xuño de 2021

FIADEIRO 2020-2021

Xa está aquí, un ano máis, o noso xornal escolar FIADEIRO! 

Entra nos códigos QR.

Goza coa súa lectura! Todas e todos formamos parte do FIADEIRO!

A entrevista, un xénero xornalístico premiado polo Faro da Escola

A aula de 1° de Primaria, baixo a coordinación da súa titora, participou no Faro da Escola coa entrevista ao veciño de Bueu, Adrián Ferrer Reboiras, quen os informou polo miúdo das súas vivencias na Illa de Ons e das dos seus devanceiros. 

Esta entrevista tan interesante resultou merecedora do 2° premio do Faro de Vigo, o que supuxo unha gran alegría para todo o alumnado e o profesorado do colexio.


                                                     PARABÉNS!!!

13 de xuño de 2021

MINUTOS MUSICAIS!

 Nesta semana que antecede á entrada do verán e se amosa tormentosa, escoitaremos o terceiro movemento pertencente á obra programática "O verán" de Antonio Vivaldi.

Neste terceiro movemento, Vivaldi describe musicalmente o tempo tormentoso desta época do ano.


Neste segundo vídeo podedes escoitar a música de Vivaldi a través dun fragmento da película "Fantasía" de Disney.



        BOA SEMANA!!!

11 de xuño de 2021

CONTOS CANTADOS: "VEO VEO"

As nenas e nenos de 6º de Infantil interpretan o conto VEO VEO, editado por Kalandraka e escrito e ilustrado por Antonio Rubio e Óscar Villán. 

Non perdades detalle, xogamos?

 

PARABÉNS!

MOI BEN CANTADO

6 de xuño de 2021

MINUTOS MUSICAIS!

Nesta semana na que vimos de celebrar o Día Mundial do Medio Ambiente (5 de xuño) e se celebra o Día Mundial dos Océanos (8 de xuño), propoñemos a escoita da canción "O VELEIRO VERDE" do grupo María FumaÇa.

 Unha canción que nos invita a coidar do  planeta!!


BOA SEMANA!!!


PRÉSTAMO DE VERÁN!

Xa están próximas as vacacións de verán para gozar do tempo libre, da familia, dos libros, da praia, do monte, da natureza...

Recorda que esta semana, entre o luns 7 e o venres 11 , teremos que devolver os diferentes materiais que teñamos prestados.

E... do luns 14 ao venres 18 poderás facer o esperado e desexado 

PRÉSTAMO DE VERÁN 2021!

As familias poden realizar o seu pedido para préstamo a través do correo:  prestamobibliomontemogos@gmail.com 

BELUSIÑA ESTÁ ESPERÁNDOTE,

ANÍMATE!

NO VERÁN, UN LIBRO NA MAN!

Praia de Pedrón


5 de xuño de 2021

5 de xuño: DÍA MUNDIAL DO MEDIO AMBIENTE

 REIMAXINA, RECREA, RESTAURA!

Cada tres segundos, o mundo perde unha superficie de bosque equivalente a un campo de fútbol.

Restaurar os ecosistemas significa previr, deter e revertir: pasar de explotar a Natureza a curala. 

Só con ecosistemas saudables podemos mellorar o medio de vida das persoas, contrarrestar o cambio climático e deter o colapso da biodiversidade.

Hoxe lánzase o "DECENIO DAS NACIÓNS UNIDAS SOBRE A RESTAURACIÓN DOS ECOSISTEMAS" (2021-2030) coa edición do "Manual de restauración dos ecosistemas, unha guía práctica para sanar ó planeta".

Proporciona pautas prácticas para restaurar oito tipos de ecosistemas: bosques, terras de cultivo, pastizales e sabanas, ríos e lagos, océanos e costas, turberas e montañas.

E ti, que podes facer para ser da xeración reimaxina?

COIDA O PLANETA,

 É A CASA COMÚN DE TODAS E TODOS!



https://unenvironment.widen.net/s/fbjbmplrnb/ecosystem-restoration-playbook-spanishv3

Escoita este poema de Jordan Sanchez:




3 de xuño de 2021

3 de xuño: DÍA MUNDIAL DA BICICLETA


https://youtu.be/YcTMWUA_g5Q

O Día Mundial da Bicicleta, celébrase desde 2018 grazas a un decreto da ONU.

É un medio de transporte sostible moi importante porque cando usas a túa bici, ademais de divertirte e manterte en forma... COIDAS O PLANETA!

A bicicleta foi o resultado dunha serie de intentos fallidos para inventar un vehículo innovador a mediados do século XIX. Existen moitos tipos de bicis: de montaña, híbridas, de ruta, urbanas. As competicións de ciclismo máis importantes son: Giro de Italia, Tour de Francia, A volta a España.

ANÍMATE e celebra este día usando a túa bicicleta!

Escoita a adaptación radiofónica da obra de teatro "Las bicicletas son para el verano" de Fernando Fernán Gómez na Cadena Ser

https://www.ivoox.com/bicicletas-son-para-verano-audios-mp3_rf_739286_1.html






 

1 de xuño de 2021

CONTOS CANTADOS: "Violín"

Os nenos e nenas de 5º de Infantil fixeron  unha versión  cantanda do conto  da editorial Kalandraka "Violín", escoitade o ben que o fan: 

 
PARABÉNS!!!

TARANDEIRA. LETRAS GALEGAS 2021

O valor das palabras, palabras cheas de vida, palabras que son apertas, palabras que son sorrisos, palabras cheas de música, palabras de POESÍA, palabras para XELA.

Na baixada están as nosas nunha tarandeira...



30 de maio de 2021

MINUTOS MUSICAIS!!

 Rematamos o mes de maio coa canción "Milonga de aquí" da cantautora galega SÉS .Un canto á vida e á liberdade !!!

RETROUSO
"E quero bailar ao ritmo
do que vive ilusionado
E coa voz do silenciado
cantar quero con paixón.
Coa querenza e coa emoción
da que non pretende nada máis
que seguir namorada
mentres quede corazón".

                                                         BOA SEMANA!!

27 de maio de 2021

ROTEIRO 4º PRIMARIA

Roteiro a Area de Bon (27/05/2021)

Nesta solleira mañá do mes de maio, a clase de 4º agardaba expectante a chegada de Elsa, a guía do Concello, para emprender a senda prometida dende había semanas.

Equipados/as con gorras, zapatillas, mochila e ilusión, emprendemos o camiño dende o portalón do colexio, rumbo á costa. Na primeira parada, Elsa ensinounos a Casa do Pobo, onde Maruxa Mallo e os seus amigos parecían convidarnos a disfrutar da observación que poderiamos levar a cabo na praia. Polo camiño, paramos para recoñecer nos hórreos e nunha casa de pedra, os valores arquitectónicos patrimoniais do noso pobo, que pouco máis adiante serían substituídos por outros valores naturais: algúns magníficos exemplares das nosas especies autóctonas, como salgueiros centenarios, carballos frondosos e loureiros, acompañados de estralotes, xestas, chuchameles... Mágoa que tamén tivemos que constatar a  presenza de moitas especies alóctonas invasoras!

Unha vez chegamos á Area de Bon, axiña nos fixamos nas moreiras onde estamos a recoller cos nosos pais, follas para alimentar os vermes de seda que coidamos na aula. Un cartaz e as profes informábannos da fraxilidade do ecosistema dunar que conforma a parte alta da praia e que agocha diversas plantas ben adaptadas a esta contorna ventosa e árida. A conxunción praia-alumnado claramente tiña que derivar en xogos, risas e area por todas partes!!! Pero algúns quixemos poñer un gran de area máis, retirando lixo.

Tras merendar, fomos explorar as rochas, nesa zona que queda descuberta durante a baixa mar e cuberta cando sube a marea: o intermareal. Nas súas pozas condénsanse multitude de organismos agardando a ansiada volta do mar: os mexillóns pechan firmemente as súas valvas, conservando o osíxeno que precisan para sobrevivir; as fermosas Actinia fragacea, recollen os seus tentáculos coa mesma intención, tentando preservarse húmidas e vivas. Ourizos de cores alineábanse nas fendas das rochas cubertas de auga e tapizaban case completamente as anchas pozas, utilizando cunchas de mexillón e anacos de algas calcáreas para camuflarse. Algas verdes, pardas e vermellas que ofrecen refuxio, humidade e alimento a estes seres a e algún esquivo camarón ou algún pequeno lorcho sorprendíanos coas súas carreiras dun lado a outro das pozas: un diminuto lorcho parecía seguir con curiosidade o dedo de Sara cando o metía na auga. 

Sabéndonos xigantes sobre un mundo fráxil, desprazámonos con moito coidado sobre as rochas ateigadas de caramuxos, balanos, lapas... Descubrir que as fermosas "pedras" rosas que tapizaban as pozas eran en realidade algas, deixounos abraiados! Tamén vimos as fermosas Padina pavonica, unha miñoca de mar verde e o espaguete de mar (Himantalia elongata). Rematando a observación cunha posta de caracola (Nucella lapidus), uns cangrexos, os seus parentes ermitaños e unha estrelamar, voltamos ao cole sen ter deixado nunca a clase.





ERIC CARLE

O escritor de libros infantís Eric Carle (1929-2021), autor do bestseller The Very Hungry Caterpillar (A eiruga comellona), faleceu aos 91 anos.

Eric Carle escribiu máis de 70 libros, entre eles o clásico de literatura infantil The Very Hungry Caterpillar, publicado en 1969 e que conta a historia da metamorfose dunha oruga nunha bolboreta. A obra estaba na décima posición dos libros máis prestados na historia da Biblioteca Pública de Nova York nunha lista que foi publicada pola institución en 2020.
 
 "Creo que é un libro de esperanza", dixo Eric Carle nun video publicado para a celebración do 50 aniversario da obra, que explicou en varias ocasións que quería que servise aos nenos na súa transición á escola, para que se puidesen identificar como enormes bolboretas.
 
 
"Os nenos necesitan esperanza. Ti, pequena insignificante eiruga, podes converterte nunha bela bolboreta e voar polo mundo co teu talento", agregou. 
 
Eric Carle naceu en Siracusa (Nova York) en 1929, pero creceu en Alemaña, volveu a EEUU, onde desenvolveu a súa carreira como deseñador, escritor e ilustrador de libros. A pesar da súa longa lista de obras, non comezou a escribir libros infantís ata os 40 anos. 
 
Para saber máis entra na páxina web do autor: https://eric-carle.com/

 

26 de maio de 2021

Lendo instrucións de montaxe

Hoxe en 5° tiñamos unha misión: montar os bancais de aromáticas sen axuda do profesorado, seguindo unicamente as instrucións de montaxe. 

Formamos dous grupos para montar cadanseu bancal e puxémonos mans á obra. Ao principio, nun equipo parecía que non chegaban as pezas; no outro comezamos e tivemos que volver empezar porque non ía ben, tivemos que poñernos de acordo; os dous equipos decidimos clasificar as pezas (un colocando nomes ás pezas, outro ordenándoas) e así resultounos máis doado. 

Ás veces é difícil chegar a acordos, pero finalmente fomos quen de acadar a montaxe dos bancais de plantas aromáticas que atraerán máis insectos ao noso hotel de bichos. 




25 de maio de 2021

Seminario "LAS BIBLIOTECAS Y LOS OBJETIVOS DE DESARROLLO SOSTENIBLE DE LA AGENDA 2030"

Esta tarde, ás 16 horas celébrase en Madrid, un evento dentro do "Ano Iberoamericano das bibliotecas" onde a nosa Biblioteca Escolar vai a estar presente. 

Seleccionaron o noso proxecto gañador do Selo CCB como exemplo de boas prácticas para a contribución dos Obxectivos de Desenvolvemento Sostible entre diferentes tipos de bibliotecas.

Se queres seguir o evento por streaming::https://youtu.be/RbxhaishbE0


Programa do Seminario: https://cutt.ly/0bKkzkv

http://www.culturaydeporte.gob.es/cultura/areas/bibliotecas/mc/ano-iberoamericano/seminario.html

#BibliotecasQueCreanFuturos

Visualiza o video enviado ao Seminario: 


Infografía do proxecto: 



 

24 de maio de 2021

FOTOS DO NOSO COLE!

 Andamos a busca de imaxes para CONMEMORAR os 50 anos do noso centro. Colabora: 


23 de maio de 2021

MINUTOS MUSICAIS!

Continuamos neste mes de maio, con música galega.

 Escoitaremos un poema de Rosalía de Castro  de Cantares Gallegos versionado polo grupo vigués "The Vacas" que leva por título REXURDIMENTE.

Unha canción que quere render homenaxe á escritora impulsora do Rexurdimento e a todas as mulleres!

"Nasín cando as prantas nasen,
no mes das froles nasín,
nunha alborada mainiña,
nunha alborada de abril.
Por eso me chaman Rosa,
mais a do triste sorrir,
con espiñas para todos,
sin ningunha para ti...

BOA SEMANA!!

20 de maio de 2021

20 de maio: DÍA MUNDIAL DAS ABELLAS, SAVE THE BEE!

Desde o ano 2018 celébrase o DÍA MUNDIAL DAS ABELLAS para sensibilizarnos acerca da importancia das abellas e do resto de insectos polinizadores no medioambiente e da súa importancia para a saúde das persoas e do planeta. 

Que podemos facer? Ti, no teu día a día:

  • Cultiva unha ampla variedade de plantas autóctonas que florezan en diferentes épocas do ano.
  • Compra mel aos agricultores da túa zona.
  • Protexe as colonias de abellas silvestres.
  • Apadriña unha colmea.
  • Deixa un cunco pouco profundo con auga limpa e pedras ou paus para que as abellas beban e non se afoguen.
  • Axuda a manter os ecosistemas forestais.

O declive no número de abellas aféctanos a todos!

Crea conciencia sobre a súa situación. Visualiza este video:



18 de maio de 2021

18 DE MAIO: DÍA INTERNACIONAL DOS MUSEOS

 


Os museos son un importante medio para o intercambio cultural, o enriquecemento das culturas, o desenvolvemento da comprensión mutua, da colaboración e da paz entre os pobos.
O MUSEO MASSÓ de Bueu para conmemorar este día convídanos a esta actividade on line: "ESTA RÍA É UN CHOIO". 

Visita o seu blog: http://museomasso.blogspot.com/2021/05/dia-internacional-dos-museos-esta-ria-e.html




16 de maio de 2021

MINUTOS MUSICAIS!

 Nesta semana na que celebramos o "Día das Letras Galegas", escoitaremos "INTEMPÉRIOME" e "Darío a Diario" cancións interpretadas polo grupo galego "A banda da Loba" como homenaxe a Xela Arias, escritora a quen se lle adica este ano as Letras Galegas.

"Intempériome" fala de deixar atrás o aprendido, os prexuízos e os estereotipos, e avanzar cara o auto-recoñecemento para sermos a persoa que queiramos ser. 

"Darío a Diario" é unha mensaxe de amor de Xela a seu fillo Darío, mais tamén é un legado para todas as mulleres sobre a maternidade entendida como un lugar onde cohabitan o amor e o racional, a protección e a liberdade na evolución do fillo.

Pertence ao último traballo da banda ,"Hasme oír", no que tamén se inclúen dúas cancións máis  dos poemarios da escritora:  Denuncia do equilibrio e Tigres coma cabalos.


BOA SEMANA!!

13 de maio de 2021

XELA ARIAS: LETRAS GALEGAS 2021

O Día das  Letras Galegas 2021, está adicado a XELA ARIAS.  (1962-2003)

Poeta, tradutora e profesora de Lingua Castelá e Literatura en diferentes institutos galegos. Traballou no Departamento de Creación e Investigación de Edicións Xerais de Galicia.

É autora dos poemarios "Denuncia do equilibrio", "Tigres coma Cabalos", "Darío a diario" e "Intempériome".

Fixo traducións ao galego de obras como "Drácula" de Bram Stoker, "As bruxas" de Roald Dahl, "O gato Gaiado e a andoriña Señá: unha historia de amor" de Jorge Amado, "Contos ao teléfono" de Gianni Rodari, entre outros autores.

 

Seleccionamos para vós diferentes recursos:

-Desde o CPI Plurilingüe dos Dices (Rois-A Coruña) chéganos, como en anos anteriores, o seu TELEXORNAL, as nenas e nenos implicados nesta experiencia de alfabetización mediática traballaron sobre XELA ARIAS, baixo a dirección do profesor Luís Aldegunde, e preséntannos un documento para achegarnos á autora e a súa obra. Parabéns!

 


-Yolanda Castaño achéganos información de Xela Arias


-A escritora Ledicia Costas conta como chegou á poesía de Xela Arias e recita un dos poemas de "Darío a diario":

 

- Información, actividades interactivas e recursos do Seminario Galán:

http://seminariogalan.org/inicio/2021

https://view.genial.ly/6032a173e83a900d217a8923

http://seminariogalan.org/inicio/2021/actividades

Grazas a todos e todas por COMPARTIR!

 

 https://view.genial.ly/607ffcdc0cd6d30d0ea74b3b/interactive-content-xela-arias-letras-galegas