PREMIO MATILDE BARES

A autora pontevedresa Eva Mejuto é a gañadora do XI Certame de Relatos de Muller Matilde Bares, convocado polo Concello de Bueu, por unha obra titulada "Matilde",  escrita cunha "gran sensibilidade" e que enxalza a vida e obra de Matilde Bares ao tempo que describe a vila de Bueu e a súa realidade nos anos trinta.

O premio rende unha homenaxe a Matilde Bares, mestra e organizadora de actividades culturais e  teatrais en Bueu.

Eva Mejuto conta cunha ampla traxectoria, tanto por ter formado parte de proxectos editoriais como pola publicación de historias para público infantil e xuvenil. Por exemplo na súa novela 22 segundos,  aborda o tema da transexualidade ou en  Memoria do silencio,  a historia das irmás Touza de Ribadavia. Tamén é coordinadora do Salón Internacional do Libro Infantil e Xuvenil de Pontevedra.