Samaín 2022

A semana do 24 ao 28 de outubro foi moi emocionante!

Iniciámola conmemorando o Día das Bibliotecas e rematámola celebrando o Samaín!

Durante toda a semana estivemos creando historias de medo, personaxes terroríficos, recreando portadas de libros e películas, realizando manualidades para decorar as clases e a entrada do centro, ...

O xoves asistimos todas e todos a unha sesión de cine terrorífica no salón de actos, divertímonos con "Hotel Transilvania". Cada persoa accedía presentando a súa terrorífica e creativa entrada.

O venres viñemos disfrazados de medo. Trouxemos merendas terroríficas. Antes do recreo visitounos polos corredores do cole a Santa Compaña moi ben dramatizada polo alumnado de 6º de Primaria. Despois do recreo bailamos todos xuntos e xuntas a canción do Samaín de Mamá Cabrá e, a continuación, movemos o noso esqueleto ao ritmo de diferentes cancións.

Na entrada gozamos dunha gran exposición de cabazas e bonecos de follaco realizadas polas familias do centro. 

A ANPA decorou o salón e deseñou un túnel do medo para a gran festa da tarde-noite. 

O noso agradecemento a todas as familias e a ANPA pola súa colaboración!